Satışda qazanc üçün 3 qızıl qayda

Satış hər hansı bir məhsulu istehsal edib və ya alıb satmaq prosesidir. Bu proses ərzində satıcı dəyər yaradır. Bu dəyərin nə qədər böyük və nə qədər davamlı olacağı satıcı bacarığından asılıdır. Böyük qazancı dələdüzlar da əldə edə bilir – əsl satıcı o kəsdir ki, uzun müddət ərzində dəyər yarada bilir. Satışda yaradılan dəyər xərclərdən çox olarsa satıcı qazanc əldə edir. Bu baxımdan dəyər qazanc ilə eyni mənadadır – dəyərsiz məhsul qazancı minimum olan, dəyərli məhsul qazancı yüksək olandır. Satışdakı qazanc nədən asılıdır və qazancı artırıb davamlı etmək üçün nə etmək lazımdır?

Satışdakı qazancı artırıb davamlı etməyin 3 qızıl qaydası var:

Satışda qazanc qaydası № 1: Xidmətçi ol

İqtisadi kateqoriya olaraq satış istehsal və xidmət sektoru ilə yanaşı qeyd olunur. Əslində isə satış da xdmətin bir növüdür. Sata bilmək üçün satıcıda xidmətçi düşüncəsi, qulluqçu məntiqi olmalıdır. Xidmətçi olmaq təkəbbürdən uzaq durmaq deməkdir. Satıcı alıcı ilə eyni sosial statusa sahib ola bilər – amma satış etmək istəyirsə xidmət göstərdiyinin fərqində olmalıdır – yəni müştəri maraqlarını öz maraqlarından üstün tutmalıdır. Bunun üçün ilk öncə nə etmək lazımdır? Satış edəcəyin müştərini ovucunun içi kimi tanımaq lazımdır. Müştəri kimdir, nəçidir, ehtiyac və istəkləri nədir? Ona daha yaxşı qulluq etmək üçün ən gizli istəklərini, özünün belə fərqində olmadığını duya bilmək əsl satıcıların bacarıqlarındandır. Bəzən satış prosesini sevgiyə, alıcı-satıcını isə sevgilərə bənzədirlər. Həqiqətən də sevmək sevdiyinə qayğı göstərməkdirsə, satışda satıcı alıcıya qayğı və diqqət göstərməyi, xidmətçi olmağı bacarmalıdır. Saxta sevginin ömrü az olduğu kimi, saxta xidmət də satış gətirmir.

Satışda qazanc qaydası № 2: Bölüşməyi bacar

Satıcı satdığı məhsulun “yaradanı” olmalıdır. Məhsul barədə hərtərəfli biliyə sahib olması, müştərinin hər bir sualına cavab verməsi satıcını alının gözündə ekspert edəcək. İnsanlar isə ekspertdən, öz işinin ustasından mal almaqdan zövq alır. Amma unutmayın ki, ekspert sahib olduğu biliyi və bacarıqları bölüşəndir. Bölüşməsə heç kim onun işinin əhli olduğunu bilməyəcəkdir. Təkəbbür burda da satışa mane olacaq. Ekspertin rəyi alıcıya verilən, ötürülən dəyərdir, alıcılar bu dəyərə çox dəyər verir. Bu dəyərin ötürülməsi prosesi alıcı ilə satıcı arasında etibar yaradır. İnsanlar isə etibar etdiklərindən almağa çalışır.

Satışda qazanc qaydası № 3: Problemləri həll elə

Alıcının satıcıya nə vaxt ehtiyacı olur? Problemi olanda. Bu problemi həll etmək üçün alıcıda satıcının satdığı mala, göstərdiyi xidmətə ehtiyacı yaranır. Satdığınız məhsul və ya xidmət müştərinin ehtiyacını ödəməyə qadir deyilsə, bəri başdan deyin. Varsa, başqa həll yolu təklif edin. Malı satmaq xətrinə satış əqdi bağlamayın. Unutmayın ki, əsl satış həm alıcının, həm də satıcının məmnun qaldığı satışdır. Biri narazı qalsa bu satış deyil, fırıldaq və dələduzluqdur. Sizin məhsul müştərinin problemini həll etməklə ona zaman və enerji qazandırmalı, stresdən və narahatçılıqdan azad etməlidir. Bu 3 şərt satışı sement kimi möhkəmləndirən vacib amillərdir. Yoxsa burnundan gətirə-gətirə satış etməklə qabağa gedə bilməyəcəksiniz.