Maraqlı sualdır, elə deyilmi? Nə qədər digital etməliyik, nə qədər digitallı olmalıyıq ki, əsas məqsədlərimizə çatmaq üçün yetərli olsun? Gəlin bu maraqlı sualın cavabı ilə bir yerdə tanış olaq.
Marketerləri daima düşündürən mövzulardan biri “Marketinqə artıq pul, vaxt, əmək, səy xərcləmirik ki?” sualıdır. Bu suala dolğun və düzgün cavab vermək üçün 5 məqam üzrə digital marketinq strategiyamızı nəzərdən keçirməliyik.
Məqam № 1: Hədəf auditoriyamızın nə qədərinə xitab edə bilirik?
İstənilən marketinq fəaliyyətinin əsas məqsədi hədəf auditoriyasının mümkün qədər böyük hissəsinə xitab edə bilməkdir. Bu səbəbdən digital marketinq strategiyasının hazırlanma mərhələsində siz, hədəf auditoriyasının nə qədərinə digital kanallar vasitəsi ilə xitab edə biləcəyinizi müəyyən etməlisiniz. Bunun üçün, Facebook İnsight, Socialbakers kimi alətlərdən istifadə etmək olar. Tutalım, Sizin əsas hədəf auditoriyanız Bakı şəhərində yaşayan, 25-34 yaşlı, idman ilə maraqlanan evli kişilərdir. Facebook Insight alətinə bu məlumatları daxil edib xitab edə biləcəyiniz auditoriya olaraq 30 min istifadəçi olduğunu görəcəksiniz. Sizin digitalda məqsədiniz aylıq olaraq bu auditoriyanın ən az 80% xitab etməkdir. Bundan aşağı rəqəm yetərsiz olacaqdır. Bir də unutmayın ki, bu araşdırma hədəf auditoriyasının aktiv olduğu bütün sosial şəbəkələr, o cümlədən populyar idman və digər internet saytları üzrə aparılmalıdır.
Məqam № 2: Hədəf auditoriyamız hansı kontentə daha çox maraqlanır?
Hədəf auditoriyanızın hansı kontentə daha çox maraq göstərdiyini bilirsinizmi? Bir az əvvəl qeyd etdiyimiz idman ilə maraqlanan evli kişilər misalında: onlar sizin Facebook səhifənizdə hansı cür kontent görmək istəyirlər? Populyar idmançılar ilə video müsahibələr? Fitness treynerlərindən məsləhətlər? Biznes karyeralarında uğur qazanmağın yolları? Hədəf auditoriyasının nə ilə maraqlandığı öyrənin, bu maraqlarını mümkün qədər tam və yüksək səviyyədə təmin etməyə çalışın. Maraq yaradacaq kontentiniz əksikdirsə, digitaldakı fəaliyyətiniz yetərsizdir.
Məqam № 3: Rəqibləriniz nə qədər aktivdir?
Digital məkanda sizin rəqibləriniz eyni hədəf auditoriyaya xitab edəcəklər. Rəqibləriniz öz kontenti ilə sizdən daha çox adamla ünsiyyət qura bilirsə, rəqiblərin kontenti daha çox maraq yaradırsa, demək ki sizin səyləriniz yetərsizdir. Gündəlik, aylıq audit bu səbəbdən çox vacibdir. Socialbakers kimi alətlər rəqibləri izləməyə və öz digital fəaliyyətinizə düzəlişlər etməyə imkan verəcək. Tutalım, siz müşahidə etdiniz ki, rəqib səhifənin Çempionlar Liqası oyunundan canlı yayımı böyük marağa səbəb oldu. Siz də Çempionlar Liqası barədə maraqlı məlumat, və ya digər populyar idman yarışlarından canlı yayımlar etməklə izləyicilərinizi maraqlandıracaq kontent hazırlaya bilərsiz. Həmçinin, analitik hesabat göstərir ki, aylıq olaraq siz 22 min izləyiciyə xitab etdiyiniz halda, rəqibiniz 30 mini əhatə etmişdir. Bunun 2 səbəbi ola bilər: ya sizin promouşn büdcəniz azdır, ya da rəqibin kontenti orqanik olaraq daha çox paylaşılır. Demək ki siz, hər iki amil üzrə öz fəaliyyətinizi təkminləşdirə bilərsiz.
Məqam № 4: Digital KPİ-ları hansı səviyyədə yerinə yetirə bilirsiz?
Düzgün təyin olunmuş KPİ (Key Perfomance İndicator) – yəni əsas perfomans göstəriciləri digitalda fəaliyyətin analizi üçün ən vacib şərtdir. Fərqli digital kanallar üçün bu göstəricilər müxtəlif ola bilər: məsələn brend saytı üçün KPİ sayta daxilolma sayı, Facebook səhifəsi üçün engagement faizi, Mesenger xidməti üçün ümumi müraciət sayı, alış-veriş saytı üçün zənbilə əlavə olunma sayı və s. KPI bir minimum göstəricidir, biznes məqsədlərinə nail olmaq üçün bu göstəricilər davamlı olaraq nümayiş olunmalıdır. Sayta gələn azdırsa, malları zənbilə əlavə edən yoxdursa, postlarımızı bəyənən və paylaşan ancaq öz işçilərimizdirsə digital fəaliyyətimiz uğursuz və yetərsizdir. Demək ki, nəyisə dəyişmək lazımdır.
Məqam № 5: Biznesin məqsədlərinə nail ola bilirsinizmi?
Digital marketinq şirkətin və brendin ümumi marketinq məqsədlərinə xidmət etməlidir. Yəni brendə tanınma, loyallıq qazandırmalı, satışların artımına gətirib çıxarmalıdır. Digital məkanı təkbaşına, digər kommunikasiya kanallarından təcrid olunmuş halda dəyərləndirmək heç də düzgün deyil. Bütün marketinq kanalları, inteqrə olunmuş şəkildə vahid bir məqsədə vurmalıdır. Ümumi marketinq auditində şahid olsanız ki, digitalda daha çox insana xitab etdiyi, daha çox insanın marağına səbəb olduğu halda satış gətirmirsə, brendin loyallığını artırmırsa demək ki bir problem var. Bu problem digital marketinq strategiyasının düzgün qurulmamasındadır, digital marketinq büdcəsinin yetərsiz və ya düzgün istiqamətdə xərclənməməsindədir, Bu səbəbdən digital marketinq fəaliyyətlərin analizi, hər reklam olunan postun dəyərləndirilməsi, ümumi nəticələrin təhlil olunması və rəqiblər ilə müqayisə olunması çox vacibdir.
